Hvernig virkar eldflaugakerfið sem skaut niður flug MH17?

Sönnunargögnin hrannast upp um óbeina aðild Rússa að því þegar farþegaþota Malaysian Airlines var skotin niður yfir Úkraínu. Til er hljóðupptaka af samtali leiðtoga aðskilnaðarsinna og rússnesks embættismanns sem er sögð bendla málið við Rússa. Þotan var skotin niður með tæknilega fullkomnu eldflugakerfi. 

Í bráðabirgðaskýrslu sem Samantha Power, sendiherra Bandaríkjamanna hjá Sameinuðu þjóðunum, skrifaði kemur fram að talið sé að farþegaþota Malaysaian Airlines í flugi MH17 hafi verið skotin niður með Buk-eldflaugakerfi eins og því sem sést á þessum myndum. (Sjá myndskeið).

Í fréttinni í meðfylgjandi myndskeiði má sjá hvernig eldflaugakerfið virkar. 

Um er að ræða mjög dýran og tæknilega fullkomin búnað sem styðst við ratsjárkerfi. Getgátur voru um að aðskilnaðarsinnar gætu hafa stolið búnaðinum af Úkraínumönnum en vopn af þessu tagi var ekki í eigu úkraínska hersins. Þá þarf ítarlega þjálfun og kunnáttu til að stjórna búnaðinum sem ekki verður hlaupið að.

Til er hljóðupptaka af samtali leiðtoga aðskilnaðarsinna og rússnesks embættismanns sem bendlar málið við Rússa. Áreiðanleiki upptökunnar hefur hins vegar ekki verið sannreyndur og því ekki vitað hvort hún er fölsuð.

Úkraínsk stjórnvöld birtu síðdegis í gær myndskeið af bíl með Buk-eldflaugum og eina þeirra vantar. Er talið að þessi eldflaug hafi grandað flugi MH17 með þeim afleiðingum að öll áhöfn og farþegar létust, 298 manns.

Vladimír Pútin hefur kennt úkraínska hernum um að hafa skotið vélina niður. Vitaly Nada, yfirmaður úkraínsku leyniþjónustunnar, virtist ekki í nokkrum vafa á blaðamannafundi hverjir bæru ábyrgð á verknaðinum þegar hann svaraði spurningum blaðamanna í Kænugarði. 

„Uppreisnarmennirnir kunna ekki að starfrækja háþróaðan og tæknivæddan skotbúnað BUK-flauganna. Til að starfrækja búnað C1N03 BUK-1 flauganna þurfa menn að hafa að baki menntun í hernaði og vera vel þjálfaðir. Við vitum fyrir víst að þetta var rússneskt teymi, rússneskir borgarar stjórnuðu BUK-1 flaugunum og þeir komu frá Rússneska ríkjasambandinu ásamt eldflaugaskotfarartækinu,“ sagði Nada.

Í Financial Times er haft eftir manni sem þekkir til í rússneskri stjórnsýslu að atvikið hafi takmarkað möguleika rússneskra stjórnvalda um tilfærslu herafla í Úkraínu.

Karl Blöndal, aðstoðarritstjóri Morgunblaðsins, hefur skrifað mikið um alþjóðamál gegnum tíðina. Karl segir að málið muni setja mikinn þrýsting á Vladimír Pútín forseta Rússlands. Pútín sé í vanda því hann hafi hrært upp í tilfinningum Rússa um innlimun Krímskaga og beri að hluta til ábyrgð á því ástandi sem skapast hafi í austurhluta-Úkraínu.

Auk þess að vera alþjóðlegur harmleikur gæti árásin markað spor í báráttunni gegn HIV og alnæmi því um borð í vélinni voru 108 þátttakendur á alþjóðlegri alnæmisráðstefnu í Melbourne í næstu viku. Þeirra á meðal Joep Lange sem var frumkvöðull í rannsóknum á HIV.