Þverá og Kjarrá standa upp úr í Borgarfirðinum

Veiðin í Þverá og Kjarrá er búin að vera góð samkvæmt leigutakanum Ingólfi Ágeirssyni en þar á bæ reikna menn með að áin gæti náð 1300-1600 löxum í sumar ef áfram heldur sem horfir

Það voru rangar tölur á bak við samanburð á veiðitölum í Þverá í frétt í morgun og er beðist velvirðingar á þeim mistökum.  Við ræddum við Ingólf áðan og þegar veiðitölur eru skoðaðar er ástandið í Þverá og Kjarrá ágætt miðað við að mikið vatn gerir veiðimönnum erfitt fyrir.  Áin er komin í 505 laxa sem er mun betri veiði en 2012 og veiðin er þrátt fyrir aðstæður á góðum dampi svo útkoman í sumar getur orðið mjög fín, svo ekki sé talandi um ef vatn færi sjatnandi.  Stórlaxinn hefur sótt í sig veðrið í Þverá og Kjarrá og Ingólfur reiknaði með að meira en helmingur aflans í dag væri tveggja ára lax og hefur ekki viðlíka hlutfall sést áður.  Ekkert lát virðist vera á göngum af tveggja ára laxi en eins og annars staðar er minna af smálaxi en áður en þó fer það skánandi.  Sem dæmi um góða veiði í erfiðum aðstæðum voru bresk hjón að ljúka veiðum í dag með 17 laxa á þremur dögum og þar af einn 18 punda og mest allur aflinn var tveggja ára lax.  Það kvartar engin yfir svoleiðis aflabrögðum.