Svipað magn kviku undir jöklinum og kom úr Eyjafjallajökli

„Mat jarðvísindamanna er að nú þegar hafi kvika safnast saman sem er með svipuð að rúmmáli og sú sem kom upp úr Eyjafjallajökli á 39 dögum.“ Þetta sagði Kristín Jónsdóttir frá Veðurstofu Íslands í aukafréttatíma RÚV fyrir skömmu.

Hún sagði að skýr merki goss hefðu sést á jarðskjálftamælum upp úr hádegi í dag. Þar hefðu greinst merki þess að kvika hefði komist í vatn.

Upp úr því var ákvörðunin tekin að færa litakóðann úr appelsínugulu í rautt, sem þýðir að flugumferð yfir Bárðarbungu verði beint annað. Stóru svæði var lokað upprunalega, eða í um 300 kílómetra radíus frá Bárðarbungu.

Kristín sagði að gangur kvikunnar hefði færst til norðurs að undanförnu og með þessu framhaldi gæti hún leitað enn lengra til norðurs. Þá kæmi hún á svæði þar sem ekki sé neinn ís yfir. Þá myndi atburðarrásin breytast fljótt.

Hún sagði virknina hafa verið hviðukenda og að hún kæmi í gusum. Þá sagði Kristín að atburðarrásin hafi verið mjög hröð og að ekkert væri hægt að útiloka um framhaldið.