Seldist upp á 2 dögum

Fyrir tveimur vikum kynnti Volvo nýja XC90 jeppa sinn fyrir heimsbyggðinni og lét þá fylgja sögunni að pantanir fyrir fyrstu 1.927 bílana af þeirri gerð mætti gera frá 3. september. Ástæðan fyrir þessum fjölda, þ.e. 1.927 bílum er vegna þess að Volvo var stofnað árið 1.927.

Það tók ekki nema ríflega tvo sólarhringa að selja þessa bíla og því má með sanni segja að þessum endurskapaða jeppa Volvo sé tekið með kostum. Þessir fyrstu bílar verða númeraðir frá eintaki 1 til eintaks 1.927.

Því miður stóð það ekki öllum markaðssvæðum til boða að panta eintak af þessum fyrstu bílum og var það meðal annars ekki hægt frá Íslandi, þrátt fyrir mikinn áhuga héðan. Hjá Brimborg, söluaðila Volvo á Íslandi, gerði þessi áhugi sannarlega vart við sig og hefði auðveldlega tugur af þessum fyrstu bílum endað hérlendis ef það hefði staðið til boða.

Brimborg hefur sjaldan áður fengið önnur eins viðbrögð við útkomu eins bíls og nýs XC90 og hafa sölumenn vart undan að svara spurningum áhugasamra. Brimborg getur pantað fyrstu XC90 bílana í janúar á næsta ári og verða þeir að vonum til afgreiðslu í apríl/maí.