Nýtt veiðihús klárt fyrir næsta sumar í Brynjudalsá

Brynjudalsá í Hvalfirði hefur lengi verið vinsæl enda veiðin góð og stutt að fara frá Reykjavík.

Það er varla yfir neinu að kvarta þegar veitt er í ánni.  Hún er passlega löng fyrir tvær stangir að fara þokkalega yfir hana á einum degi, veiðin er góð og veiðistaðirnir skemmtilegir.  Það sem helst stóð því fyrir þrifum að segja ánna afbragðs kost var skortur á veiðihúsi því græni hjallinn sem stóð neðan við Efri Foss var ekki manni bjóðandi.

Það er þess vegna gleðiefni að greina frá því að nýtt veiðihús verður tekið í gagnið við Brynjudalsá næsta sumar og stendur á góðum stað í dalnum þar sem útsýnið yfir dalinn tekur á móti þér á morgnana þegar stigið er út.  Það er nokkuð víst að þetta á eftir að auka aðsókn að ánni enn frekar því það sem stóð veiðimönnum helst fyrir þrifum að taka konurnar með sér í þessa skemmtilegu á var skortur á snyrtilegri salernisaðstöðu já og góðu húsi til að borða í hádeginu í hvíldinni.