Ekkert ferðaveður á meðan stormurinn gengur yfir

Veðurfræðingur á Veðurstofu Íslands segir í samtali við fréttastofu að ekkert ferðaveður verði á landinu þegar stormur gengur yfir landið.

Þá varar Vegagerðin við því að Hellisheiði, Þrengsli og Mosfellsheiði geti lokast upp úr klukkan 18 vegna veðurs. Um miðnætti er hætta á að fjallvegir lokist á Austurlandi.

Horfur um landið allt næsta sólahringinn eru slæmar en búast má við vaxandi suðaustanátt og með snjókomu eða slyddu síðdegis, fyrst suðvestan til. Suðaustan 20-28 m/s sunnan- og vestan til í kvöld.

Suðaustan 20-28 norðan- og austantil í nótt, en snýst í mun hægari suðvestan átt sunnan- og vestan til. Slydda eða snjókoma í nótt, en mikil slydda eða rigning suðaustanlands. 



Suðvestan 8-15 m/s um hádegi á morgun og él, en léttir til norðaustanlands. Heldur hægari síðdegis, en hvessir ört norðvestan til með snjókomu. Dregur úr frosti í dag og hlánar víða við ströndina í kvöld og nótt, en kólnar heldur á morgun.

Veðrið fer hratt versnandi undir kvöld á Hellisheiði, í Þrengslum og á Mosfellsheiði. Snjókoma þar, skafrenningur og afar lítið skyggni. Þá er spáð er vindhviðum 40-50 metrum á sekúndu m.a. á Kjalarnesi og undir Hafnarfjalli frá kl. 18 og fram yfir miðnætti. Eins undir Eyjafjöllum og í Mýrdal í kvöld og fram á nótt.

„Við erum að spá suðaustan stormi,“ segir Helga Ívarsdóttir, veðurfræðingur á Veðurstofu Íslands.

„Þetta byrjar allt saman sunnan og vestan lands í kvöld og færist síðan austur yfir landið í nótt. Veðrið tekur síðan að róast þegar líður á nóttina og ætti að vera gengið yfir um hádegisbilið á morgun.“

Helga segir að Veðurstofan spái stormi í kvöld en ekki ofsaveðri eins og Íslendingar urðu varir við í síðustu viku.

„Vindhviður geta orðið á milli fjörutíu og fimmtíu metrar á sekúndu í kvöld og nótt. Þessu mun fylgja talsverð úrkoma, slydda eða snjókoma. Það má búast við mikilli úrkomu á suð-austurlandi.

Helga segir að ekkert ferðaveður verði á landinu meðan veðrið gangi yfir.