Vann 11,2 milljarða og ætlar að kaupa nýjan Subaru Forester

Kona ein í Washington fylki í Bandaríkjunum vann 11,2 milljarða króna í lottói og það fyrsta sem hún ætlar að kaupa er glænýr Subaru Forester bíll.

Margir aðrir hefðu fjárfest í bíl frá Bentley, Rolls Royce eða öðrum glæsibílaframleiðendum, enda sæi varla högg á vatni þó svo nokkrir slíkir lúxusbílar yrðu keyptir.

Hin heppna kona, Lisa Quam að nafni, segir að bíll eins og Subaru Forester sé afar heppilegur bíll fyrir fólk sem býr í eins norðlægu fylki sem Washington fylki er og sá bíll geti glímt við snjóinn sem þar er víða að finna.

Hann var einnig mjög hógvær bandaríski vinningshafinn sem varð 55,5 milljörðum ríkari í fyrra og fékk sér í kjölfarið notaðan Acura NSX sportbíl, sem hann hafði haft augastað á lengi. Sumir virðast ekki tapa sér í gleðinni þó heppnin banki hressilega á dyrnar.