Nýr GLE Coupe frá Benz

Mercedes Benz mun kynna þennan nýja GLE Coupe á bílasýningu í Detroit í næsta mánuði. Það fer ekkert á milli mála við hvaða bíl þess nýi bíll á að keppa, þ.e. BMW X6. Hann er nauðalíkur honum og eiginlega jafn lítið fyrir augað, en þörfum Bandaríkjamanna þarf að sinna, eða það telur Mercedes Benz greinilega.

Ekki er búist við magnsölu á þessum bíl en BMW hefur selt á bilinu 4.500 til 6.700 X6 bíla á hverju ári frá því að fyrirtækið kynnti hann til sögunnar árið 2008, en salan í fyrra var 5.500 bílar. BMW hefur verðlagt X6 hærra en X5 jeppann og því hagnast mjög á framleiðslu hans. Það sama ætlar Mercedes Benz að gera.

Mercedes Benz GLE Coupe verður verðlagður hærra en M-jeppar fyrirtækisins, sem fást ódýrastir á 49.225 dollara. Fyrst mun Mercedes Benz kynna þennan nýja bíl með 3,0 lítra bensínvél með tveimur forþjöppum, sem skilar 362 hestöflum.

Hann verður með 9 gíra sjálfskiptingu með 5 akstursstillingum, „individual, comfort, slippery, sport og sport+“. Bíllinn er með loftpúðafjöðrun með „active roll stabilization“ veltivarnarbúnaði og hann stendur á 21 tommu dekkjum.