Wu-Tang kynslóðin

Við erum Wu-Tang kynslóðin. Við fæddumst á níunda og jafnvel tíunda áratug síðustu aldar. Við ólumst upp við að hlusta á tónlist frá ólíkum stöðum og urðum fyrir áhrifum frá mismunandi menningarheimum. Við litum upp til ýmissa og þar skipti kynþáttur og þjóðerni engu máli. Wu-Tang kynslóðin er víðsýn og horfir öðruvísi á heiminn en fyrri kynslóðir.

Áhrifa uppeldis þessarar kynslóðar gætir víða; í heimi þar sem afþreying skiptir meira máli en áður og allar upplýsingar eru tiltækar með auðveldri uppflettingu. Lítum til dæmis á stjórnmálin. Leiðtogar ungliðahreyfinga flokkanna eru ekkert með svo ólíka sýn á lífið, líkari sýn en líklegast hefur áður þekkst á milli stjórnmálaleiðtoga. Frjálslyndi virðist vera samnefnarinn. Og sem betur fer eru ungir stjórnmálamenn í flestum tilfellum alþjóðlega sinnaðir.

Wu-Tang kynslóðin er líka fljót að hugsa og veita aðhald. Nú geta stjórnmálamenn ekki lengur bullað í beinni útsendingu. Fólk horfir og hlustar á þá og skiptist um leið á skoðunum á samfélagsmiðlum á borð við Twitter og Facebook. Staðreyndir skipta kynslóðina meira en skoðanir stefnumótandi aðila. Því má binda vonir við að stjórnmálaumræða framtíðarinnar fari úr átakastílnum yfir í meiri pólitíska samræðu þvert á flokkslínur. Að hin „realíska“ sýn á heimsmyndina hverfi hægt og rólega, ef við horfum á málið í samhengi við alþjóðasamskipti, og við taki frjálslyndari sýn á heiminn þar sem öryggi og hagur borgaranna skiptir meira máli en orðabókarskilgreining á fullveldi ríkisins.

En af hverju að nefna kynslóðina eftir hljómsveitinni Wu-Tang? Jú, því fólk af þessari kynslóð man eftir því þegar frægðarsól rapparanna frá New York reis sem hæst hér á landi. Merkið þeirra er eftirminnilegt og tónlistin hafði áhrif. Hún veitti okkur innsýn í líf sem við þekktum ekki, líf í fátækrahverfum Bandaríkjanna. Sýndi okkur líf fólks með annað gildismat en við, þar sem erfiðara var að lifa góða lífinu sem við lifðum hér á Íslandi. Og þetta innlit í líf annarra hjálpar okkur að sjá heiminn í nýju ljósi, hjálpar okkur að skilja og setja okkur í spor annarra.

Nú hlýtur okkar tími að fara að koma.