Milljón ferðamenn til Íslands 2014

Fjöldi ferðamanna um Keflavíkurflugvöll, Seyðisfjörð (Norrænu) og aðra flugvelli var um 997 þúsund árið 2014. Það eru 190 þúsund fleiri ferðamenn en árið 2013 og nemur aukningin 23, 6 prósentum. Þetta kemur fram í úttekt Ferðamálastofu. 

Þá voru farþegar með skemmtiferðaskipum 104.516. Þeir komu til Reykjavíkur með 90 skipum og voru 13,4 prósentum fleiri en á árinu 2013 þegar þeir voru 92 þúsund talsins. Um 96 prósent skemmtiferðaskipa til landsins hafa viðkomu í Reykjavík.

Bretar og Bandaríkjamenn voru í meirihluta ferðamanna um Keflavík og Seyðisfjörð, eða 73,3 prósent. Þá voru Þjóðverjar í Norrænu langfjölmennastir eða 42,5 prósent af heild en þar á eftir komu Færeyingar, 12,2 prósent, og Danir, 11,7 prósent.

Fjöldamet voru slegin í öllum mánuðum ársins 2014 á Keflavíkurflugvelli. Aukning milli ára fór yfir 25 prósent sjö mánuði ársins. Hlutfallslega var hún mest í janúar eða 40,1 prósent. Í febrúar nam aukningin 31,2 prósentum, í mars 35,3 prósentum og í nóvember 31 prósenti.