Öruggt hjá Drekunum | Sigurður stigahæstur

Sundsvall Dragons vann sinn þriðja sigur í röð í sænsku úrvalsdeildinni í körfubolta í kvöld er liðið hafði betur gegn Umeå á útivelli, 89-61.

Sigurinn var sannfærandi eins og tölurnar bera með sér en Sundsvall náði forystunni á upphafsmínútunum og hún jókst eftir því sem leið á leikinn.

Jakob Sigurðarson skoraði sautján stig fyrir Drekana og var næststigahæstur í liðinu. Hlynur Bæringsson skoraði sjö stig og Ægir Steinarsson fimm, sem og Ragnar Nathanaelsson.

Sundsvall er í fjórða sæti deildarinnar með 40 stig ásamt tveimur öðrum liðum og er aðeins tveimur stigum frá toppliði Norrköping.

Solna Vikings vann Örebro, 101-88, þar sem Sigurður Þorsteinsson skoraði 21 stig og tók fimm fráköst. Sigurður var stigahæstur í liði Solna sem er í sjöunda sæti deildarinnar með 22 stig.