Búist við stormi síðdegis á morgun

Veðurstofan býst við stormi eða roki síðdegis á morgun og er reiknað með að meðalvindur verði víða 20 til 28 metrar á sekúndu.

Búist er við vaxandi suðaustanátt, 18 til 28 m/s síðdegis með mjög snörpum vindhviðum við fjöll sunnan- og vestanlands en hvessir norðan og austantil um kvöldið.

Í tilkynningu frá Veðurstofunni segir að reiknað sé með snjókomu í fyrstu, en síðan slyddu og jafnvel rigningu á láglendi. „Talsverð úrkoma á S-verðu landinu og hlýnar um stund, en úrkomuminna NA-til. Snýst í sunnanátt með slydduéljum V-til annað kvöld og kólnar aftur.“

Í tilkynningunni segir jafnframt að búist sé við vonskuveðri frá því eftir hádegi á morgun fram á aðra nótt. „Skyggni veður lélegt vegna snjókomu og skafrennings og búast má við að ferðalög yfir heiðar og fjallvegi verði erfið eða ómöguleg. Veðrið gengur yfir S- og V-lands milli kl. 19 og 21, en eftir miðnætti á austanverðu landinu.