Bílasala í Evrópu upp um 7% í febrúar

Sala bíla í Evrópu hélt áfram að vaxa í síðasta mánuði líkt og í janúar. Salan í febrúar var 7% meiri en árið á undan og er salan samtals á árinu 6,6% meiri en í fyrra. Til loka febrúar hafa 1,99 milljón bíla selst í Evrópu.

Þessi vöxtur nú er talsvert meiri en spáð hafði verið fyrir upphaf ársins, en margir höfðu spáð 2-3% vexti í ár. Nú hallast menn frekar að því að vöxturinn verði um 5%.

Vel gekk að selja hjá Volkswagen bílafjölskyldunni og þar varð 11% vöxtur. Mjög vel gekk hjá Seat sem jók söluna um 23% en hjá Volkswagen merkinu sjálfu var vöxturinn 11%. Skoda jók söluna um 8%. Gangur frönsku bílaframleiðandanna var ólíkur, en Renault sá 14% vöxt í sölu en PSA/Peugeot-Citroën aðeins 1%.

Fiat náði 5,1% vexti en góða sala Jeep bíla skapaði 11% vöxt hjá Fiat Chrysler Automobiles. Sala Opel jókst um 6%, Ford um 6,8%, Nissan um 27%, Toyota um 7%, Kia um 6% en sala Hyundai bíla stóð í stað á milli ára.