Promens fer á milli Dalvíkur og Akureyrar á rafmagnsbíl

Promens Dalvík fékk á dögunum afhentan nýjan Kia Soul EV rafbíl frá bílaumboðinu Öskju og er mikil ánægja með hann norðan heiða.

,,Við erum mjög kátir með rafbílinn. Honum er mest ekið á milli Dalvíkur og Akureyrar og 120 km hleðslan dugar léttilega í það verkefni. Við leggjum áherslu á að lágmarka umhverfisáhrif fyrirtækisins og höfum á undanförnum árum tekið mikilvæg skref í þá átt að draga úr notkun kolefnisorkugjafa en auka vægi innlendrar grænnrar orku við framleiðslu á afurðum okkar.

Það var því ánægjulegt að geta tekið eitt skref í viðbót og skipt díselknúnum bíl út fyrir Kia Soul rafbíl. Það sparar eldsneyti, mengunin er engin og svo er bíllinn bara mjög skemmtilegur í akstri að ógleymdri sjö ára ábyrgðinni sem hafði mikla þýðingu fyrir okkur þegar við tókum ákvörðun um það hvaða rafbíl skildi kaupa ,” segir Daði Valdimarsson, framkvæmdarstjóri hjá Promens Dalvík.

Fyrirtækið er leiðandi í heiminum í hönnun og framleiðslu á hverfisteyptum einangruðum kerum sem nota má undir allar tegundir matvæla. Kia Soul EV hefur 145 km hámarkshraða og uppgefið hámarksdrægi við bestu aðstæður er um 212 km.