Mikið af ref á veiðislóðum

Það eru ekki bara á rjúpnaveiðitímabilinu sem veiðimenn verða mikið varir við mink og ref heldur einnig á veiðislóðum stangveiðimanna.

Það hafa borist nokkrar fréttir um dýr skotin við veiðistaði víða um land síðustu daga en þegar veiðimönnum fjölgar við ár og vötn fjölgar auðvitað fundum þeirra við refi og minka.  Það eru allir veiðimenn sammála um að það er greinilegt að mikil fjölgun hefur orðið á einhverjum svæðum af ref því hann er í meiri mæli farinn að sækja í byggð og hafa veiðimenn sem hafa verið t.d. í sjóbirtingsánum fyrir austan séð refi ítrekað við veiðistaði og jafnvel komið að þeim gera tilraun til að róta í matarleyfum í ruslapokum sem hafa ekki náð í tunnuna.

Refurinn er almennt talinn einn stærsti þátturinn í fækkun rjúpunnar en hún er hans aðalbráð og þegar refnum fjölgar gengur hratt á þegar viðkvæman rjúpnastofn.  Sveitafélögin hafa verið misdugleg að koma að veiðunum og þar sem veiðar á ref og mink eru litlar eða engar er áberandi meira af tilkynningum um dýr við mannabústaði.  Þeir sem hafa verið við veiðar í vor hafa margir hverjir verið með byssur í bílum sínum sem hefur greinilega komið sér vel en nokkur dæmi eru um að veiðimenn hafi komið heim með fleiri refi en fiska eftir veiðihelgar.