Kallar stjórnmálamann helvítis kommúnista

Tónlistarmaðurinn Noel Gallagher var gestur í spjallþættinum Chatty Man með Alan Carr í Bretlandi um helgina og lét hann þar ýmislegt flakka. Gallagher var spurður um væntanlegar kosningar í Bretlandi en þá kom fram að Gallagher getur ekki kosið sjálfur þar sem hann verður í Bandaríkjunum og væri orðinn of seinn til að senda atkvæði sitt með pósti. Gallagher sagði að hann gæti hvort sem er ekki stutt neinn frambjóðenda að þessu sinni, ekki einu sinni Ed Miliband, leiðtoga Verkamannaflokksins, en hljómsveitin Oasis var lengi vel tengd við þann flokk í stjórnartíð Tony Blair. Sagði Gallagher að ef Miliband fengi tækifæri til þess að leiða þjóðina myndi hann ekki standast prófið og spurði þáttastjórnandinn Alan Carr af hverju hann segði það og stóð þá ekki á svörum hjá Gallagher „Af því að hann er „fokking“ kommúnisti“

Noel Gallagher nýtti einnig helgina í að svara spurningum aðdáenda á Reddit og kom þar ýmislegt fram. Þar sagðist hann t.d. vera ein síðasta alvöru rokkstjarnan og það væri hlutverk sem hann kynni vel við. Hann nýtti einnig tækifærið og dró úr þeim vangaveltum að hann og fyrrum erkióvinur hans, Damon Albarn í Blur, myndu vinna saman að tónlist í náinni framtíð. Eftir að sættir tókust á milli þeirra hafa þeir báðir gefið í skyn að þeir hafi áhuga á að vinna að tónlist saman og sagði Gallagher að áhuginn væri vissulega enn til staðar en því miður liti út fyrir að hvorugur aðili hefði tíma í náinni framtíð.

Leikstjóri nýrrar heimildarmyndar um Kurt Cobain hefur nú gefið í skyn að von sé á sólóplötu frá Cobain í sumar. Brett Morgan, sem leikstýrði myndinni Cobain: Montage of Heck, hafði aðgang að nærri 200 klst af hljóðupptökum með Cobain og sagði leikstjórinn það vera í vinnslu að gefa hluta af þessum upptökum út í sumar. En á upptökunum má heyra demó upptökur af Nirvana lögum, Bítlaábreiður og svo einnig lagabútar frá Nirvana og Courtney Love. Morgan sagði að diskurinn myndi vera líkt og að eyða heilum degi með Cobain í heimabæ hans í Bandaríkjunum.

Hljómsveitin Mammút hefur nú skrifað undir hjá útgáfufyrirtækinu Belle Union í Bretlandi en fyrirtækið sér um að gefa út tónlist hljómsveita á borð við Fleet Foxes, The Flaming Lips, John Grant og fleiri. Hljómsveitin gefur út smáskífu fyrir Evrópu- og Bandaríkjamarkað í sumar og stefnir svo á að gefa út nýja breiðskífu árið 2016. Hægt er að lesa meira um þennan nýja samning hér.