Supra Paul Walker seldist á 24 milljónir

Bílarnir sem komið hafa við sögu í Fast & Furious bílamyndunum eru eðlilega eftirsóttir en ekki síst ef þeim hafði verið ekið af Paul Walker, sem lést er tökur stóðu yfir á síðustu mynd.

Uppboðshaldarinn Mecum í Indianapolis í Bandaríkjunum bauð nýlega upp Toyota Supra bíll sem Paul Walker ók í Fast & Furious myndunum og seldist hann á 185.000 dollara, eða 24,4 milljónir króna. Þessi bíll er ekki sá eini úr myndunum sem boðinn hefur verið upp að undanförnu og eiga þeir allir það sammerkt að seljast á háu verði.

Útlit bílsins bendir til þess að hann sé ofuröflugur, með stóran vindkljúf að aftan og heljarinnar „body kit“ allan hringinn. Kaupandi bílsins fær þó ekkert tryllitæki í hendurnar þar sem bíllinn er með 3,0 lítra og 220 hestafla vél og 5 gíra beinskiptingu. Tveir Holley nítró-kútar eru reyndar í skottinu, en þeir eru aftengdir eins og er.