Arnarvatnsheiðin kemur vel undan vetri

Heiðarvötnin eru eitt af öðru að verða fær veiðimönnum en víða er ennþá mikill snjór við vötnin.

Arnarvatnsheiðin er gott dæmi um þetta en veiðimenn sem eiga leið uppá heiðina eru minntir á að aka ekki utanvegar því jarðvegurinn er mjög laus og blautur eftir veturinn. Ekki er akstursfært að öllum vötnum ennþá og þau vötn sem ófært er að verða því líklega bara hvíld þangað til vegurinn verður í lagi. Þrátt fyrir þessar aðstæður eru veiðimenn farnir að týnast upp á heiðina og það er óhætt að segja að veiðin er góð og bleikjan sérstaklega væn.

Hilmar Högnason og veiðifélagar hans voru upp á Arnarvatnsheiðinni og það er óhætt að segja að þeim hafi gengið vel en bæði veiddist vel og fiskarnir rígvænir. Eins og sést á meðfylgjandi mynd eru stærstu bleikjurnar um 4-6 pund, stuttar og hnausþykkar eins og fjallableikjur verða gjarnan. Fiskurinn kemur því vel undan vetri og þrátt fyrir að sumarið sé seinna á ferðinni virðist það ekki hafa nein áhrif á tökugleðina. Við hvetjum veiðimenn til að deila með okkur veiðisögum og veiðimyndum í sumar. Sendið okkur póst á kalli@365.is