Korpa komin í 36 laxa

Veiðin í Korpu er hægt og rólega að komast í gang og síðustu daga hafa göngur tekið nokkurn kipp.

Það virðist þó vera að laxinn sé fljótur upp ánna og upp á efri svæðin en veiðimenn kvarta ekki yfir því þar sem svæðin ofan við Berghyl eru þau sem veiðast best á flugu. Áin á sinn fasta kúnnahóp sem heldur mikið upp á þessa litlu perlu sem hún er og þess má geta að hún er alveg sjálfbær og hefur öllu jöfnu verið með mjög jafna veiði í gegnum tíðina.

Staðan í veiðibókinni í gær var 36 laxar sem er alveg prýðileg veiði miðað við árstíma og hversu seint göngurnar eru að koma. Meðalveiðin í ánni frá 1974 eru 296 laxar og það verður að teljast gott meðaltal á aðeins tvær stangir. Aðeins Laxá á Ásum hefur hærri meðalveiði á tvær stangir. Það er skemmtilegur tími framundan í Korpu og samkvæmt heimasíðunni hjá leigutakanum Hreggnasa eru einhverjir lausir dagar á stangli í ánni.