Kia GT4 Stinger árið 2020

Kia hefur í dágóðan tíma haft á prjónunum að framleiða sportbíl og nú hefur verið staðfest frá höfuðstöðvum þeirra að svo verður, en ekki fyrr en árið 2020.

Það verður hinn fríði Kia GT4 Stinger sem rúlla mun eftir færiböndum Kia eftir 5 ár, en sá bíll var kynntur á bílasýningunni í Detroit í fyrra. Þar var hann kynntur með 315 hestafla vél og afturhjóladrifinn eins og sannir sportbílar eru.

Vélin er aðeins 2,0 lítra sprengirými en með forþjöppu. Fyrri gerð þessa bíls sem nefndur var Kia GT Concept og sýndur á bílasýningunni í Frankfurt árið 2011 var með 3,3 lítra og 390 hestafla vél. Það hefur Kia mönnum ef til vill fundist yfirdrifið og henni skipt út fyrir minni en aflmikilli vél, líklega til að halda verði bílsins niðri.

Það er ekki síst aðalhönnuður Kia, Peter Schreyer, sem hvatt hefur aðra stjórnendur Kia til að framleiða sportbíl, en það mun gera Kia merkið aðeins meira spennandi en það er í dag.