Veiði

Blanda fer yfir 3000 laxa í dag

Karl Lúðvíksson skrifar
Veiðin í Blöndu hefur verið ótrúleg í allt sumar og það virðist ekkert vera að hægja á henni.

Það bárust að venju nýjar tölur frá Landssambandi Veiðifélaga í gær og eins og má sjá á þeim lista, sem má finna hér, er Blanda efst með 2997 laxa sem er lokatalan í gærkvöldi. Veiðin hefur verið góð á öllum svæðum en síst á svæði II sem er aðallega vegna slakrar ástundunar en ekki fiskleysis. Þetta er metsumar í Blöndu en mest var veiðin áður árið 1975 samtals 2363 laxar svo það met hefur verið slegið allrækilega og áin á ennþá mikið inni.

Ólíklegt er að hún fari í yfirfall í ágúst svo þessi tala á enn eftir að hækka en hversu mikið er erfitt að segja til um. Hver skýringin er svo á þessari miklu laxgengd í ánna í sumar er erfitt að segja til um en áin er gífurlega há í framleiðni á seiðum og greinilegt að hrygning tekst vel í ánni sem og virðist fæðuframboð fyrir seiðin vera mjuög gott. Afföll eru talin vera frekar lág þar sem seiðin fá mikið skjól í Jökulvatninu á meðan þau dvelja í ánni þar til þau ná göngustærð og þegar komið er til sjávar virðast fæðustöðvar þeirra taka vel á móti þeim því laxinn er vel haldinn. Það verður spennandi að sjá lokatöluna úr Blöndu eftir þetta frábæra tímabil.

Mest lesið




×

Mest lesið