Vörurnar sem koma til greina í sniðgöngu borgarinnar

Birgir Olgeirsson skrifar 17. september 2015 08:46

Tillaga Bjarkar Vilhelmsdóttur um að Reykjavíkurborg sniðgangi ísraelskar vörur var samþykkt af borgarstjórn. Vísir/Vilhelm

Innkaupadeild Reykjavíkuborgar mun setjast niður með borgarlögfræðingi í vikunni til undirbúa og útfæra sniðgöngu borgarinnar á ísraelskum vörum meðan hernám Ísraelsríkis á landsvæði Palestínumanna varir.

Það var Björk Vilhelmsdóttir, fráfarandi borgarfulltrúi Samfylkingarinnar, sem fékk þessa tillögu samþykkta en í greinargerð sem fylgir tillögu er ekki talað um útfærslur á þessari sniðgöngu. Því er ekki vitað á þessari stundu hversu langt Reykjavíkurborg mun ganga, hvort hún muni einungis sniðganga vörur sem framleiddar eru í Ísrael, eða hvort hún gangi lengra og sniðgangi einnig vörur sem hafa verið þróaðar í Ísrael, eru að hluta frá Ísrael eða frá fyrirtæki sem eru hliðholl Ísrael.

Jóhanna Eirný Hilmarsdóttir, deildarstjóri innkaupadeildarinnar, segir að þessi mál verði skoðuð í vikunni og gat því ekki tjáð sig um það á þessari stundu.

Björk Vilhelmsdóttir segir þetta vera almenna viljayfirlýsingu sem eigi eftir að útfæra. „Almennt er viðskiptabann þannig að þá á það við um ísraelskar vörur, svo getur vel verið að það þróist eitthvað áfram,“ segir Björk og nefnir sem dæmi þær vörur sem sniðgönguhreyfing fyrir Palestínu, BDS Ísland, hefur hingað til sniðgengið.

Við minnum á að mikið er um ísraelskar vörur á Íslandi sem ekki eru endilega merktar með strikamerki ríkisins og því er...
Posted by Við kaupum ekki vörur frá Ísrael on Wednesday, September 16, 2015

Hún tekur fram að þessi viljayfirlýsing borgarstjórnar snúi einungis að vörukaupum en ekki þjónustu því Ísrael hefur innleitt þjónustutilskipun Evrópusambandsins og evrópska efnahagssvæðisins.

Hér má finna lista með vinsælum ísraelskum vörumerkjum. Vörurnar eru oftar en ekki unnar úr hráefnum frá herteknum svæð...
Posted by Við kaupum ekki vörur frá Ísrael on Tuesday, August 5, 2014

Verkfræðingurinn Tómas Hafliðason fer yfir þau áhrif sem þessi viljayfirlýsing getur haft á innkaup borgarinnar á bloggi sínu. Hann nefnir til sögunnar vörurnar sem eru sannarlega ísraelskar, eru framleiddar í Ísrael, eða framleiddar af fyrirtækjum sem hafa stutt Ísraelsríki með einhverjum hætti.

Þau fyrirtæki sem hafa stutt Ísrael með einhverjum hætti, svo sem að halda áfram viðskiptum við landið þó svo að sett hafi verið viðsiptabann á það, eru Coca Cola, Pepsi Co. McDonalds, Siemens, Kimberley-Clark, Loréal, Revlon og Starbucks.

Þá framleiðir matvælaframleiðandinn Nestlé einnig vörur í Ísrael og notar ísraelska framleiðslu í vörur frá sér. Á listanum yfir vörur frá Nestlé eru: Nescafé, Perrier, Vittel, Pure Life, Carnation, Libby´s, Miklmaid, Nesquik, Maggi, Buitoni, Cross & Blackwell, KitKat, Milkybar, Quality Street, Smarties, After Eight, Aero, Polo og Lion svo dæmi séu tekin.

Fyrirtækið Intel er einnig með verksmiðjur í Ísrael en örgjörvi fyrirtækisins er að finna í fjölda af PC tölvum sem og í tölvum frá Apple. Það á einnig við um HP-tölvur og IBM.

Þá festi ísraelski samheitalyfjarisinn Teva Pharmaceutical Industries Ltd. kaup á samheitalyfjahluta Allergan í sumar, en Allergan er móðurfyrirtæki Actavis á Íslandi.

Líkt og fyrr segir er hefur þessi sniðganga Reykjavíkurborgar ekki verið útfærð og er ákvörðunar innkaupadeildar borgarinnar beðið.

Reykjavíkurborg sniðgengur Ísrael Tækni

Tengdar fréttir

Mest lesið

Fleiri fréttir