Cadillac Escalade með 600 hestafla Corvettu-vél

Margir bílaframleiðendur ætla á næstunni að setja á markað mjög öfluga lúxusjeppa og ekki má Cadillac missa af þeirri lest. Svo virðist vera miðað við þau áform fyrirtækisins að setja í bílinn sömu vél og er að finna í Chevrolet Corvette Z06, en hún skilar 600 hestöflum.

Breytingafyrirtækið Hennessey í Bandaríkjunum hefur fram að þessu séð um að útbúa ofuröflugar útfærslur af Escalade, en nú ætlar Cadillac bara að sjá um það sjálft. Þessi öfluga vél úr Corvette Z06 er Cadillac-mönnum ekki alveg ókunn, en hana má einnig finna í Cadillac CTS-V.

Escalade mun í staðinn fórna 420 hestafla, 6,2 lítra V8 L86 vél sinni, en nýja vélin er reyndar með sama sprengirými. Átta gíra sjálfskipting hjálpar til að færa allt aflið til dekkjanna og bíllinn fær stillanlega fjöðrun. Búast má við því að þessi nýi öflugi Escalade muni kosta hátt í 90.000 dollara, en ódýrasta gerð hans kostar nú frá 72.970 dollurum í Bandaríkjunum.

Með þessum 600 hestöflum slær Escalade í afli við jeppum eins og Mercedes Benz GL63 AMG sem er 550 hestöfl, Range Rover Supercharged með 510 hestöfl og Porsche Cayenne Turbo S sem er 570 hestöfl. Vafalaust verður hann þó áfram lang slakastur þeirra í akstri og flestir þeirra hinna verða líklega að auki fljótari úr sporunum.