Kominn er tími á mygluna

Undanfarna daga og vikur hefur Fréttablaðið staðið fyrir ítarlegri umfjöllun um þá meinsemd sem myglusveppur er í húsum. Sögurnar eru ótal margar af erfiðleikum vegna heilsubrests, hvort heldur er vegna slíkrar sýkingar á heimilum fólks eða vinnustað.

Sú þrautaganga sem fólk hefur mátt þola til að fá veikindi sín viðurkennd er sláandi og sú staðreynd að fólk virðist engar bætur fá jafnvel þótt það missi bæði húsnæði og innbú vegna smits frá sveppunum. Fyrir nokkru lýsti einn þolandi slíkrar húsasóttar að þetta væri einna helst líkt því að lenda í bruna, en án þess að nokkur sýndi skilning þeim aðstæðum sem fólk væri lent í. Húseigendatryggingar ná ekki yfir slíkar raka- og mygluskemmdir.

Í umfjöllun blaðsins í fyrradag var frá því greint að tveir fimmtu þeirra sem veikir hafi orðið vegna myglusveppa á vinnustað sínum hafi ekki átt afturkvæmt til starfa á sama vinnustað. „Við erum fjórar sem erum frá vinnu á BUGL þessa dagana vegna myglu,“ sagði Rósa Steinsdóttir listmeðferðarfræðingur, en myglusveppir hafa ítrekað valdið veikindum starfsfólks á Landspítalanum.

Þá hefur komið fram að einstaka leigusalar hafi legið á því lúalagi að leigja ítrekað út „sýkt“ húsnæði, jafnvel þótt vitað sé að fyrri leigjendur hafi hrakist úr húsnæðinu vegna myglu.

Tjón af völdum myglusveppa er langt því frá sér­íslenskt fyrirbrigði, en víða hefur tekist betur upp við að koma á einhvers konar öryggisneti handa fólki sem lendir í áföllum vegna þeirra. Í mars á þessu ári skilaði tillögum sínum starfshópur um endurskoðun laga og reglugerða með tilliti til myglusvepps. Þar hefur verið unnið ágætisstarf og lesningin fróðlegt yfirlit yfir gildandi reglur hér á landi.

Tillögurnar ganga mikið til út á ráðleggingar um aukna fræðslu til að koma í veg fyrir myglu í hús­um, meðan minna fer fyrir ráðleggingum um hvernig bæta megi stöðu þess fólks sem fyrir smitinu verður.

Þó er lagt til að horft verði til Danmerkur sem fordæmis um hvernig hlutir megi betur fara. Þar er notuð byggingargallatrygging sem veitir neytendum vernd og felur í sér skoðun sérfræðinga tryggingafélags á húsnæði einu og fimm árum eftir byggingu þess. Tryggingin, sem húsbyggjandi kaupir, er líklega til þess fallin að auka byggingarkostnað, en það er líka dýrt að láta fólk veslast upp í sjúkdómum og fjárhagsáföllum vegna myglu.

Þá er lagt til að tekin verði upp í húsaleigulög ákvæði um skyldu leigusala til að upplýsa leigutaka um raka og mygluvandamál í húsnæði. Þessar breytingar yrðu strax til bóta, þótt þær séu ekki nema skref í áttina að því að rétta hlut þeirra sem orðið hafa fyrir barðinu á myglusveppum.