1.155 lúxusbílar seldir á árinu

Þegar rýnt er í tölur frá Samgöngustöfu um nýja selda bíla á árinu sést að selst hafa 1.155 bílar sem teljast lúxusbílar. Lúxusbílar teljast af bílamerkjunum Audi, BMW, Jaguar/Land Rover (m.a. Range Rover), Lexus, Mercedes Benz, Tesla og Volvo.

Það sem af er ári eru bílar Mercedes Benz lang söluhæstir þeirra hér á landi með 407 bíla. Þar á eftir er Volvo (211), Jaguar/Land Rover (185), Audi (137), BMW (94), Porsche (61), Lexus (40) og Tesla (17).

Á árinu hafa alls selst 13.508 bílar og því eru þessir 1.155 lúxusbílar um 8,6% heildarinnar. Það er sama hlutfall og í fyrra og árið 2013 var það 8,5%, árið 2012 8,2%, árið 2011 7,8% og árið 2010 5,5%. Þetta hlutfall hefur því hækkað stöðugt frá hruni en um mjög lítið á síðustu árum og nánast staðið í stað á síðustu 3 árum.

Sala nýrra bíla hefur vaxið mjög á undanförnum árum og farið úr 3.395 bílum árið 2010 í 10.611 bíla í fyrra og í ár fer hún líklega yfir 14 þúsund bíla. Árið 2010 seldust aðeins 188 lúxusbílar hérlendis. Þeir voru 426 árið 2011, 702 árið 2012, 682 árið 2013, 912 í fyrra, eru nú orðnir 1.155 og gætu hæglega endað í 1.300 bílum.