Nýtt rúgbrauð frá Volkswagen

Volkswagen mun sýna nýja gerð rúgbrauðsins fræga á Consumer Electronics Show í janúar næstkomandi. Nýja rúgbrauðið mun fást sem rafmagnsbíll með 400 km drægni, en einnig með bensín- og dísilvélum.

Bíllinn sem sýndur verður á sýningunni verður tilraunabíll, en ekki endanleg útfærsla bílsins, en stefnan hjá Volkswagen er að framleiðsla á bílnum muni hefjast árið 2017.

Þetta er ekki í fyrsta skiptið sem Volkswagen ýjar að nýju rúgbrauði, eða að minnsta kosti frá árinu 2001. Það ár kynnti Volkswagen slíkan bíl í Detroit, en ekki varð af framleiðslu hans. Annar tilraunabíll birtist svo árið 2011 og fékk hann gælunafnið Bulli, en hann komst ekki frekar á framleiðslulínu fyrirtækisins.

Vonandi kemst þessi nýi tilraunabíll í framleiðslu, en vafalaust munu margir aðdáendur rúgbrauðsins fagna því. Rúgbrauðið var framleitt samfellt í 63 ár en bíllinn var framleiddur víða um heiminn, en síðustu bílarnir rúlluðu af færiböndum Volkswagen í Brasilíu árið 2013. Ef af framleiðslu nýs rúgbrauðs verður, mun bílinn verða settur saman í Mexíkó, en þar er einnig Bjallan framleidd.