Engin breyting hjá Njarðvík

Njarðvík mun ekki styrkja leikmannahópinn að svo stöddu en lokað verður fyrir félagaskipti á miðnætti.

Þetta staðfesti Gunnar Örlygsson, formaður körfuknattleiksdeildar Njarðvíkur, við íþróttadeild í dag.

Njarðvík hafði hug á að styrkja hópinn og finna leikstjórnanda en Björn Kristjánsson, leikmaður KR, hafði verið orðaður við Njarðvíkurliðið.

„Liðið hefur verið að eflast í síðustu leikjum en engu að síður munum við skoða leikmannamarkaðinn þegar glugginn opnast 1. janúar,“ sagði Gunnar.

Njarðvík er í fimmta sæti Domino's-deildar karla með átta stig. Liðið hefur unnið síðustu tvo leiki sína í deildinni - gegn Tindastóli og FSu.