Fór á 250 milljónir

Þessi Mercedes Benz 300SL Gullwing skipti um hendur um daginn í einkasölu fyrir 1,9 milljón dollara, eða 250 milljónir króna. Mercedes Benz 300SL Gullwing er einn eftirsóttasti bíll meðal bílasafnara og þessi tiltekni bíll er af árgerðinni 1954. Aðeins einn slíkur hefur selst á hærra verði af sömu árgerð, en hann seldist á 2,2 milljónir dollara árið 2012 á Barrett-Jackson uppboðinu.

Mercedes Benz 300SL Gullwing var ofurbíll síns tíma, hann sameinaði stórkostlegt útlit og frábæra akstursgetu, auk þes sem hann er með sínar óvenjulegu fiðrildahurðir sem opnast uppá við. Þetta tiltekna eintak er í fullkomnu ástandi. Hann var upphaflega í eigu timburiðnaðamógúls í Kanada og hann pantaði bílinn með öllum mögulegum aukahlutum.

Eigandinn hafði mikla trú á þýskum bílum og taldi þá eiga mikið erindi til heimalands síns og stofnaði Mercedes Benz umboð í Vancouver. Þessi bíll var tíðum sýningarbíll í þessu söluumboði uns hann var seldur árið 1956. Því hefur honum ekki verið mikið ekið, eða aðeins 74.000 kílómetra. Það reiknast sem aðeins 1.200 kílómetrar á ári.

Árið 1990 var hann sprautaður uppá nýtt og fékk uppgerð á innréttingunni. Hinsvegar hefur ekkert verið átt við vél eða drifbúnað bílsins frá upphafi. Hæsta verð sem fengist hefur fyrir Mercedes Benz 300SL Gullwing af hvaða árgerð sem er er 4,62 milljónir dollara, eða 600 milljónir króna sem fékkst fyrir einn slíkan árið 2012.