„Ég er birtingarmynd málsins“

„Ég held að fólk haldi greinilega að ég hafi miklu meiri aðkomu að málinu en ég hef og kannski af því að það er svo stutt síðan ráðuneytið hafði úrskurðarvaldið, sem það hefur ekki lengur. Þannig að ég er birtingarmynd málsins, jafnvel þótt að ég hafi ekki getað haft nein áhrif á það.“

Þetta segir Ólöf Nordal, innanríkisráðherra, um þá ákvörðun Útlendingastofnunar að vísa 27 einstaklingum frá Íslandi í nótt og í morgun. Um var að ræða fimm fjölskyldur; þrjár frá Makedóníu og tvær frá Albaníu. Fjölskyldurnar frá Albaníu hafa vakið hvað mesta athygli, en í báðum þeirra eru veik börn.

Ólöf segist ekki hafa haft beina aðkomu að málinu og það hafi ekki farið fyrir kærunefnd útlendingamála.

Sjá einnig: Albönsku fjölskyldurnar ákváðu að una niðurstöðu Útlendingastofnunar

„Það sem ég get gert er að fara yfir það hvort að með einhverjum hætti sé hægt að bæta úr framkvæmdinni. Svo getum við alltaf rætt það hvort að reglurnar séu eins og þær eigi að vera og svo framvegis.“

Báðar albönsku fjölskyldurnar sem voru sendar úr landi í nótt höfðu ákveðið að una við ákvörðun Útlendingastofnunar um synjun á hæli og höfðu dregið til baka kærur sínar til kærunefndar útlendingamála.

Sjá einnig: Segir albönsku fjölskylduna ekki hafa getað annað en unað niðurstöðunni

„Ég hef ekki beina aðkomu að málinu og ég held að það hafi verið samstaða um það að það sé ekki æskilegt að stjórnmálamenn séu með tilviljanakenndum ákvörðunum að gera það.“

Erfiðar ákvarðanir

Ólöf hefur ekki séð rökstuðning Útlendingastofnunar í málum veiku barnanna tveggja sem voru flutt af landi brott í nótt. Hún segist hafa fylgst með þessu máli í fréttum og hún geri sér grein fyrir því að þetta séu ekki auðveldar ákvarðanir fyrir starfsmenn Útlendingastofnunar að taka.

„Ég held að það skipti máli að koma því til skila að þetta eru erfið mál fyrir alla. Þetta eru einstaklingar í viðkvæmri stöðu og við skiljum það öll.“

Lögfræðingar fjölskyldnanna hafa bent á að þau hefðu alveg eins átt von á því að þær fengju dvalarleyfi af mannúðarástæðum. Ólöf segist ekki geta sagt til um það með afgerandi hætti hvort það hafi reynt á það gagnvart börnunum. Þar sem þessi mál koma ekki inn á hennar borð og hún þekkir þau ekki til hlítar.

Undirskriftasöfnun hefur verið sett af stað þar sem farið er fram á að Ólöf Nordal segi af sér vegna málsins. Þegar þetta er skrifað hafa tæplega 4.500 manns skrifað undir hana.

Stutt síðan ráðuneytið hafði úrskurðarvaldið

„Ég held að fólk haldi greinilega að ég hafi miklu meiri aðkomu að málinu en ég hef og kannski af því að það er svo stutt síðan ráðuneytið hafði úrskurðarvaldið, sem það hefur ekki lengur. Þannig að ég er birtingarmynd málsins, jafnvel þótt að ég hafi ekki getað haft nein áhrif á það.“

Ólöf segist skilja þessar tilfinningar.

„Við erum öll manneskjur og ég skil það. Mér finnst vont að lesa það að ég sé ómanneskjuleg og að ég hafi engar tilfinningar gagnvart þessu fólki. Það er ekki þannig. Við verðum samt að gera hlutina með réttum hætti.“

Hún ætlar að skoða þetta mál nánar og segir að eflaust megi læra af því.

„Ég held að við þurfum að gera betur í því að byggja upp traust á milli þeirra stofnana sem að taka þessar þungu ákvarðanir og síðan almennings sem að horfir á og verður óttasleginn og finnur til með fólkinu. Við þurfum að gera betur þarna. Ég sé það og tek undir það.“