Magna Steyr kaupir Getrag

Magna Steyr í Austurríki, sem framleiðir bíla m.a. fyrir Mercedes Benz, BMW, Mini og Jaguar/Land Rover, hefur keypt skiptingaframleiðandann Getrag Group fyrir 244 milljarða króna.

Hvorki Magna Steyr né Getrag eru mjög þekkt nöfn í bílaheiminum, en staðreyndin er sú að hjá Magna International, móðurfyrirtæki Magna Steyr, vinna 139.000 manns og hjá Getrag Group vinna 14.000 manns, svo úr verður 153.000 manna fyrirtæki. Það slagar hátt í allan vinnumarkaðinn á Íslandi.

Getrag hefur framleitt skiptingar í bíla fyrir BMW, Mercedes Benz, Renault, Volvo, og Ford, svo nokkrir þekktir bílaframleiðendur séu nefndir. Starfsemi Getrag þykir falla vel að Magna Steyr og víst er að afar sterkt fyrirtæki hefur orðið til með kaupunum. Viðskiptavinirnir eru að mörgu leiti þeir sömu og bæði starfa þau í hinum sístækkandi bílabransa.

Magna Steyr er einna frægast fyrir að framleiða Mercedes Benz G-Class (Geländerwagen) fyrir Daimler en fyrirtækið framleiðir meira en 200.000 bíla á ári fyrir hin ýmsu bílamerki og hefur til að mynda sérhæft sig í framleiðslu blæjubíla. Höfuðstöðvar Magna Steyr eru í Graz í Austurríki.