Aldrei eins margir sótt um vernd á Íslandi og í fyrra

Aldrei hafa eins margir sótt um vernd á Íslandi og á síðasta ári. Umsóknir um vernd voru tvöfalt fleiri árið 2015 en síðustu tvö ár á undan, alls 354. Stærsti þjóðernishópurinn sem fékk vernd er frá Sýrlandi.

Útlendingastofnun veitti áttatíu og tveimur einstaklingum hæli eða aðra vernd á Íslandi í fyrra. Þar af voru Sýrlendingar fjölmennastir eða sautján talsins. Samtals var fólki af tuttugu og sex þjóðernum veitt vernd á árinu.

Fjölmennastir meðal þeirra sem sóttu um hæli voru Albanar, en þeir voru um þrjátíu prósent allra hælisleitenda. Samanlagt komu fjörutíu og tvö prósent umsókna frá löndum Balkanskagans, Albaníu, Kósóvó og Makedóníu. Sýrlendingar, Írakar og Afganar koma þar á eftir.

Niðurstaða fékkst í 323 mál sem stofnunin hafði til afgreiðslu. Áttatíu og tvær umsóknir voru ekki teknar til efnislegrar meðferðar vegna þess að umsækjendur höfðu þegar fengið dvalarleyfi í öðru landi eða mál þeirra voru til meðferðar í öðru ríki, og fjörutíu og sjö umsækjendur drógu umsóknir sínar til baka eða hurfu, að því er segir í skýrslu Útlendingastofnunar.

Af þeim 194 umsóknum sem teknar voru til efnislegrar meðferðar var veitt vernd í áttatíu og tveimur tilvikum, þar af fengu sextíu og sex viðurkennda stöðu sína sem flóttamenn og sextán einstaklingar fengu dvalarleyfi á grundvelli mannúðarsjónarmiða. 112 umsækjendum var synjað um vernd.

Fjölmennasti þjóðernishópurinn sem fékk vernd á Íslandi voru Sýrlendingar, en þeir voru sautján talsins. Í tölunum eru ekki meðtaldir þeir kvótaflóttamenn sem boðið var til landsins af stjórnvöldum. Því næst voru Rússar, Íranir, Nígeríumenn og Úkraínumenn.

Í skýrslunni kemur fram að niðurstaðan sé í samræmi við niðurstöður mála í öðrum Evrópuríkjum en samanlagt veitingarhlutfall Sýrlendinga í aðildarríkjum Evrópusambandsins á þriðja ársfjórðungi 2015 var 98 prósent en aðeins 1 prósent fyrir Albana.