Nýr Kia Optima frumsýndur

Nýr Kia Optima verður frumsýndur hjá Bílaumboðinu Öskju nk. laugardag kl. 12-16. Kia Optima er fallegur og rúmgóður fjölskyldubíll sem vakið hefur verðskuldaða athygli. Þetta er fjórða kynslóð Optima sem er flaggskipið í hinni breiðu fólksbílalínu Kia.

Hönnunin er sportleg og falleg bæði að innan og utan. Mestu breytingarnar eru að framan þar sem komin eru ný LED aðalljós og þokuljós og að aftan eru komin ný og lagleg LED ljós. Talsverð breyting er í innanrýminu og þar er nú að finna meiri þægindi og lúxus en áður.

Kia Optima kemur hingað til lands eingöngu í Premium útfærslu til að byrja með en mun verða síðar í boði í EX úgáfu. Í Premium útgáfu er Kia Optima mjög vel búinn með leðursætum, glerþaki, bakkmyndavél og rafstýrðum framsætum svo eitthvað sé nefnt.

Í bílnum er tæknivæddur 8” upplýsingaskjár sem er staðalbúnaður og veitir aðgengi að öllu því helsta sem ökumaður og farþegar þurfa á að halda. Bíllinn er einnig með þráðlausri hleðslu fyrir snjallsíma og lyklalausu aðgengi. Nýr Optima er enn stærri og rúmbetri en forverinn sem nú þykir rúmgóður í alla staði.

Ný og endurhönnuð 1,7 lítra dísilvél er í nýja bílnum sem skilar 141 hestöflum. Þessi nýja vél er bæði eyðslugrennri og umhverfismildari en í forveranum. Þá kemur Optima með nýrri 7 gíra DCT sjálfskiptingu sem fengið hefur mjög góða dóma.

Í fyrsta skipti mun Kia bjóða upp á sérstaka sportútgáfu Kia Optima GT sem verður sérlega kraftmikil með 241 hestafla bensínvél með forþjöppu. Optima GT og Optima í Plug-In Hybrid útfærslu munu verða kynntir síðar. Þessar tvær útfærslur eru væntanlegar á markað eftir um ár og sömu sögu er að segja um Optima í langbaksútfærslu sem mun bjóða upp á enn meira farangursrými.

Nýr Kia Optima er að sjálfsögðu með 7 ára ábyrgð eins og allir nýir Kia bílar en þetta er lengsta ábyrgð sem er í boði hjá bílaframleiðanda í heiminum í dag.