Árið byrjar með krafti í bílasölu

Sala á nýjum fólks- og sendibílum var 76% meiri í nýliðnum janúar en í sama mánuði 2015 samkvæmt skráningartölum Samgöngustofu. Alls seldist 1.341 bíll í mánuðinum, samanborið við 761 bíl í janúar 2015.

Af þeim keyptu einstaklingar og fyrirtæki (án bílaleiga) 846 bíla og bílaleigurnar 495. Eftirtektarvert er að bílaleigurnar keyptu 204 prósentum fleiri bíla í nýliðnum mánuði heldur en í janúar 2015, alls 495 bíla. Hefur orðið mikil breyting á því hvenær árs bílaleigurnar kaupa bíla sína og dreifist það nú mun jafnar um árið en áður var er kaupin áttu sér einungis stað á vorin og snemmsumars.

BL ehf. seldi 337 bíla í janúar samanborðið við 173 í sama mánuði 2015 sem er 95% aukning. Toyota seldi 341 bíl og aukningin þar 75%. Hekla seldi 235 bíla og þar var aukningin 130% á milli ára.

Af einstökum bíltegundum hjá BL seldist Renault í flestum eintökum, eða 92. Vinsælasta einstaka bílgerðin var hins vegar Nissan Qashqai sem jafnframt var mest seldi sportjeppinn í janúar með 47 selda bíla.

Markaðshlutdeild BL var 25,1% í janúar samanborið við 22,7% í sama mánuði fyrir ári. Toyota var með 25,4% hlutdeild og Hekla 17,5%.