Er fertugt nýja tvítugt í fyrirsætuheiminum?

Þrátt fyrir að Dior og Prada hafi nýlega notað 15 og 16 ára stelpur í auglýsingaherferðirnar sínar, hafa vinsældir fyrirsæta yfir fertugu sjaldan verið meiri. 

Oftar en ekki hafa tískurisar verið gagnrýndir fyrir að nota alltof ungar fyrirsætur í herferðir og á tískupöllunum, en nú virðist sú þróun vera að snúast við.

Glamour sagði frá því fyrir skemmstu að ofurfyrirsætur tíunda áratugarins væru mættar aftur fyrir framan myndavélina í auglýsingaherferð fyrir Balmain. Það voru þær Claudia Shiffer, Cindy Crawford og Naomi Campbell. Eru þær allar komnar yfir fertugt.

Fyrirsæturnar Eva Herzigova, Stella Tennant, Amber Le Bon og Nadja Auermann sátu fyrir í auglýsingaherferð fyrir Giorgio Armani, en þær eru eins og hinar allar komnar yfir fertugt. 

Þá eru þær Naomi Campbell, Amber Valletta og Christy Turlington allar á forsíðum tískutímarita fyrir vorið 2016.

Nú er bara að bíða og sjá hvort þessi þróun sé ekki komin til að vera-og þannig verði fertugt hið nýja tvítugt?