Renault Zoe mest seldi rafmagnsbíll Evrópu

Renault Zoe seldist í 18.453 eintökum í Evrópu á síðasta ári og var söluhæsti einstaka rafmagnsbíll álfunnar. Heildarsala Zoe í heiminum öllum var 23.086 og var hann ekki söluhæsti rafmagnsbíll heims þar sem til dæmis Nissan Leaf og Tesla Model S seldust í mun fleiri eintökum.

Renault Zoe var langsöluhæsti rafmagnsbíll Frakklands, með 48,1% markaðshlutdeild. Síðasta útgáfa Renault Zoe kemst 240 km á fullri hleðslu og jókst drægni hans um 25 kílómetra frá fyrri gerð bílsins. Renault hefur selt alls 62.228 rafmagnsbíla frá árinu 2010.

Heildarsala rafmagnsbíla í Evrópu á síðasta ári var 97.687 bílar og jókst um 47,8% frá árinu áður. Engu að síður er það aðeins 0,61% af heildarsölu bíla í Evrópu í fyrra. Ef að vöxtur í rafmagnsbílasölu vex jafn hratt á þessu ári og því síðasta má búast við um 145.000 bíla sölu og að rafmagnsbílar nái um 0,9% hlutdeild í heildarsölu.

Það er því langt í land að rafmagnsbílar teljist til stórrar hlutdeildar í sölu bíla og það í Evrópu, sem er þó einna móttækilegust fyrir slíkum bílum.