Veðurstofan varar við ótraustum snjóalögum og geislum sólarinnar

Veðurstofa Íslands bendir fólki á ferð í fjallendi á óstöðug snjóalög víða um land og því hætta á að ferðamenn komi af stað snjóflóðum. Þá beinir Veðurstofan einnig þeim tilmælum til útivistarfólks sem er um lengri tíma í sól, þar sem snjór einnig hylur jörðu, að verja sig gegn geislum sólarinnar, til dæmis með því að nota sólgleraugu og sólarvörn. Gerir Veðurstofan það í ljósi þess að óvenjulágt óson mælist nú yfir Íslandi og er spá sólbjörtu veðri í dag.

Verður fínasta vetrarveður á landinu öllu í dag og víða talsvert af sólskini, en kalt. Í kvöld fer dregur til tíðinda þegar allmikil lægð kemur inn á Grænlandshaf, en þá hvessir af suðaustri og snjóar suðvestanlands. Á morgun gengur síðan suðaustanstormur yfir landið með talsverðri úrkomu og sums staðar mikilli rigningu eða slyddu. Á Norðausturlandi verður þó heldur hægara og úrkomulítið fram á kvöld. Hlýnandi veður í bili og hiti 0 til 5 stig á morgun.

Veðurhorfur á landinu næstu daga:

Á mánudag:

Suðaustan 18-23 m/s og slydda eða snjókoma S- og V-lands, en hvassari og rigning eftir hádegi, talsverð eða mikil úrkoma SA-til síðdegis. Lægir V-lands um kvöldið. Úrkomulítið NA-til fram eftir degi, en fer síðan að snjóa þar. Hlýnandi veður og hiti 0 til 5 stig um kvöldið.

Á þriðjudag:

Vestan og suðvestan 15-23 m/s og él um morguninn, en dregur síðan talsvert úr vindi og úrkomu og kólnar í veðri.

Á miðvikudag:

Suðlæg átt og dálítil él, en úrkomulítið N-til. Kalt í veðri.

Á fimmtudag:

Hægviðri, skýjað með köflum og talsvert frost.

Á föstudag:

Suðaustlæg átt og snjókoma eða slydda, en úrkomulítið NA-til. Hlýnar heldur í veðri.

Á laugardag:

Hæg suðlæg átt, stöku él og kalt í veðri.