Hver af þessum fimm verður kokkur ársins 2016?

Næstkomandi laugardagskvöld fer fram úrslitakeppni í Kokkur ársins 2016 í Hörpu. Í vikunni sem er að líða kepptu tíu keppendur sín á milli um þau fimm sæti sem í boði eru á úrslitakvöldið. Keppendurnir elduðu kjúklingarétt eftir sínu höfði sem átta dómarar dæmdu eftir útliti, bragði og faglegum vinnubrögðum í eldhúsi.

Þeir fimm sem keppa sín á milli á laugardagskvöldið eru þeir Ari Þór Gunn­ars­son hjá Fisk­fé­lag­inu, Axel Björn Clausen Mati­as hjá Fisk­markaðnum, Den­is Grbic hjá Grill­inu á Hót­el Sögu, Haf­steinn Ólafs­son hjá Nasa og Sig­ur­jón Bragi Geirs­son hjá Kola­braut­inni.

Að sögn Hafliða Halldórssonar, eins af aðstandenum keppninnar, var mjótt á muninum hjá fyrrnefndum keppendum og má því búast við harðri keppni í Hörpu. 

Á föstudagskvöldið fá keppendur klukkustund til að skoða það hráefni sem er í boði í keppninni sjálfri og munu þeir nýta sér það í forrétt, aðalrétt og eftirrétt. 

Sam­hliða úr­slita­keppn­inni verður glæsi­leg­ur fjór­rétta Kokka­landsliðskvöld­verður í boði ásamt veglegri skemmtidagskrá auk þess sem Ragn­heiður Elín Árna­dótt­ir iðnaðar- og viðskiptaráðherra mun krýna sig­ur­veg­ara keppn­inn­ar kl. 23:00 sem hlýt­ur titil­inn Kokk­ur árs­ins 2016. Þeir sem vilja tryggja sér miða geta sent tölvupóst á netfangið chef@chef.is

Sigurvegari keppninnar heldur svo til Danmerkur í mars þar sem hann mun taka þátt fyrir Íslands hönd í hinni virtu keppni Nordic Chef of the year.