Vefsalan farin í gang hjá Lax-Á

Vefsalan hjá Lax-Á hefur verið opnuð og þar má finna leyfi í margar af vinsælustu veiðiám landsins og er Blanda líklega sú sem mest er sótt í.

Frá opnun til loka júlí er löngu uppselt og þar komast færri að en vilja. Það er svo sem ekkert skrítið að mikið hafi verið sótt í ánna enda metsumar að baki 2015 og ekkert sem bendir til annars en að seiðabúskapurinn í ánni sé í miklum blóma og annað gott sumar sé í vændum. Besti dílinn er hins vegar í Blöndu II en það er svæði sem er stórkostlega vanmetið en mikið af laxi gengur þarna í gegn á hverju sumri en þar sem svæðið er víðfemt þarf að þekkja það aðeins eða fá leiðsögn frá leiðsögumönnum. Leyfin eru á 20.000 og 26.000 svo betri díl er varla hægt að gera í góðri laxveiðiá í dag.

Önnur veiðisvæði hjá Lax-Á sem eru komin á vefsöluna eru t.d. Eystri Rangá, Hallá, Hvannadalsá, Miðdalsá, Langadalsá, Svartá, Sogið og Tungufljót. Mikil ásókn er í veiðileyfi þessa dagana eftir metsumarið í fyrra og veiðileyfasalar verða einnig varir við mikla aukningu erlendra ferðamanna til landsins en það var svo sem ekki við öðru að búast eftir metsumarið 2015.  Vefsöluna hjá Lax-Á má finna hér.