Lokað um Siglufjarðarveg og Súðavíkurhlíð vegna snjóflóða

Lokað er um Siglufjarðarveg og Súðavíkurhlíð vegna snjóflóða.

Þetta kemur fram á vef Vegagerðarinnar. Almannavarnadeild ríkislögreglustjóra lýsti í gærkvöldi yfir óvissustigi vegna snjóflóðahættu á norðanverðum Vestfjörðum.

„Hálka er á Sandskeiði og Hellisheiði en snjóþekja í Þrengslum. Á Suðurlandi er hálka eða hálkublettir en þó sumstaðar snjóþekja.

Áframhaldandi hálka og hálkublettir eru svo á Vesturlandi en snjóþekja er víða á Snæfellsnesi ásamt éljagang á norðanverðu nesinu.

Á  Vestfjörðum eru allir fjallvegir ófærir nema Miklidalur og Hálfdán en þar er snjóþekja ásamt skafrenning. Snjóþekja og þæfingur er annars víðast hvar á láglendi.

Snjóþekja er á flestum aðalleiðum á Norðurlandi vestra en þæfingur og stórhríð er á milli Blönduós og Skagastrandar. Þá er ófært um Þverárfjall og þæfingsfærð er milli Sauðárkróks og Hofsós.

Norðaustanlands er einnig snjóþekja og víða þæfingur. Þungfært er um Mývatnsöræfi.

Á Austurlandi er þungfært á Möðrudalsöræfum en verið er að hreinsa. Hálka eða hálkublettir eru á flestum öðrum leiðum, segir í tilkynningu frá Vegagerðinni.