Benz pallbíll kynntur í París í haust

Í nokkurn tíma hefur legið fyrir að Mercedes Benz ætlar að koma með pallbíl á markað á næstunni. Nú hefur heyrst að hann verði kynntur á bílasýningunni í París í haust og þar getur almenningur litið framleiðsluútgáfu hans. Bíllinn á svo að fara í almenna sölu um ári síðar.

Mercedes Benz kynnti fyrst þau áform að smíða pallbíl í mars í fyrra, bíls sem ætti að geta borið 1 tonn á pallinum og yrði byggður á grind. Þessi nýi pallbíll Mercedes Benz mun eiga margt sameiginlegt með næstu gerð Nissan Navara og hefur Benz unnið í samstarfi með Renault-Nissan að þróun bílanna beggja.

Pallbíll Benz verður í boði með 6 strokka bensín- og dísilvélum. Ekki liggur enn ljóst fyrir hvort bíllinn fær nafnið X-Class eða GLT, til að ríma við bílgerðirnar GLA, GLC, GLE og GLS. Mercedes Benz ætlar að smíða pallbílinn bæði á Spáni og í Argentínu og bjóða hann í upphafi í Evrópu, S-Ameríku, Afríku og Miðausturlöndum.

Bíllinn verður með talsvert meiri íburði en Nissan Navara, þó undirvagn hans verði nánast sá sami, en ytra útlit þeirra verður líka ólíkt.