Vorveiðin fer ágætlega af stað í Grímsá

Sjóbirtingsveiðin í Grímsá í Borgarfirði fer ágætlega af stað að þessu sinni en veiði hófst þann 2. apríl.

Grímsá hefur verið betur þekkt sem laxveiðiá en í henni er líka nokkuð sterkur stofn sjóbirtings.  Sem dæmi má nefna að í haustveiðinni er neðsta svæðið í ánni oft feyknagjöfult á fallega birtinga en þeim fiskum til happs þá eru flestir veiðimenn ofar í ánni að eltast við lax.  Veitt er á tvær stangir og hafa veiðimenn verið að reka í ágæta sjóbirtinga víða í ánni. Enn er þó mikið af hoplaxi á svæðinu og eru veiðimenn, eftir sem áður, beðnir um að fara vel með fiskinn með það að markmiði að sleppa honum eins ósködduðum og kostur er.

Eitthvað af lausum dögum má finna á heimasíðunni hjá leigutakanum, Hreggnasa, og er verðið á þessum dögum mjög gott miðað við góða veiðivon.  Hreggnasi er einnig með Laxá í Kjós á sínum snærum en vorveiðin þar getur verið svakalega góð enda eru fáar ár á vesturlandi með jafn öflugan stofn sjóbirtings.  Mikið er af hoplaxi í Kjósinni sem og niðurgöngu birting en hann er mjög stutt kominn í niðurgönguferlinu.