Andlitslyftur Lexus IS í Peking

Nú er bílasýningin í Peking hafin og margir bílaframleiðendur frumsýna nýja bíla sína þar. Einn slíkra bíla er endusköpuð útgáfa Lexus IS sem hefur nú fengið andlitslyftingu og því ekki um nýja kynslóð bílsins að ræða, sem kom fram árið 2013. Það sem helst einkennir breytinguna á þessum bíl er að grillið og loftinntökin að framan hafa stækkað og er það í takti við aðrar nýlegar gerðir Lexus bíla. Framljósin hafa einnig breyst og eru nú orðin L-laga. Línurnar á hliðum bílsins hafa verið skerptar og fær hann fyrir vikið sterkari karaktereinkenni. Lexus segir að breytingarnar á bílnum eigi að verða til þess að bíllinn sýnist á ferð þrátt fyrir að standa kyrr, eitthvað sem oft hefur reyndar heyrst í bílaheiminum. Upplýsingaskjárinn í bílnum stækkar úr 7 tommum í 10,3 tommur og skerpa hans aukin með hærri upplausn. Að öðru leiti er innrétting bílsins eins þó svo smávægilegra breytinga gæti. Bíllinn er áfram með 3 vélarkosti. Í IS200t er 241 hestafla fjögurra strokka vél með forþjöppu. IS300 er með 255 hestafla V6 vél og IS350 með 306 hestafla 3,5 lítra V6 vél.