Ford Mustang langsöluhæsti sportbíll heims

Í fyrra tókst Ford að selja 141.868 Mustang sportbíla og með því var hann langsöluhæsti sportbíll heims, en enginn annar sportbíll seldist í meira en 100.000 eintökum í fyrra.

Ford Mustang er seldur um allan heim eða alls á 140 mörkuðum og selst t.d. vel í Evrópu en fáir bandarískir bílar seljast í miklu magni í Evrópu. Í fyrra seldust alls yfir 16.600 Mustang bílar í Evrópu. Í fyrra gerðist það fyrsta sinni að Ford Mustang seldist í meira magni en Chevrolet Camaro og Dodge Challenger til samans.

Ford Mustang er nú í boði með eyðslugrannri 2,3 lítra EcoBoost vél og selst Mustang vel í þeirri útfærslu á báðum ströndum Bandaríkjanna en bæði í miðríkjum Bandaríkjanna og á mörkuðum erlendis kjósa kaupendur fremur bílinn með V8 vél. Ford Mustang selst mjög vel í Ástralíu, svo vel reyndar að hann er uppseldur út næsta ár og þeir sem vilja tryggja sér eintak þar fá ekki nýjan Mustang afhentan fyrr en árið 2018.

Mustang má fá í blæjuútgáfu og í Þýskalandi er hæst hlutfall Mustang pantaður þannig, eða einn þriðji seldra Mustang bíla. Á síðust árum hafa erlendir sportbílar verið vinsælir í Bandaríkjunum, en nú er aftur runninn upp sá tími að Bandaríkjamenn velja sér heimasmíðaðan sportbíl umfram aðra.