Forsetinn segist hafa verið að tala um fjölskyldu sína á Íslandi þegar hann svaraði CNN

Ólafur Ragnar Grímsson, forseti Íslands, telur fjölmiðlaumfjöllun erlendis um aflandseign eiginkonu hans Dorrit Moussaieff ekki hafa skaðað ímynd Íslands. Þetta sagði Ólafur Ragnar í hádegisfréttum Bylgjunnar sem heyra má hér fyrir ofan. Þar var hann spurður hvers vegna hann neitaði aðkomu Dorritar að aflandsfélögum í viðtali við CNN í apríl síðastliðnum þrátt fyrir að hafa fullyrt á seinni stigum málsins að hafa aldrei haft upplýsingar um fjármál Dorrit. 

„Þegar ég svaraði þeirri spurningu og hún nefndi fjölskyldu mína þá átti ég nú við fjölskyldu mína á Íslandi vegna þess að þannig skil ég það orðalag,“ sagði Ólafur.

„Og varðandi Dorrit þá hafði ég engar upplýsingar um það og það hafði aldrei borist í tal milli okkar en það hefur komið á daginn að þessar upplýsingar sem voru birtar í upphafi þessarar viku í raun og veru eru ekki mótsögn við það sem ég sagði vegna þess að ef að við skoðum það sem birtist í byrjun þessarar viku þá er það í fyrsta lagi að það séu bankareikningar í Sviss, sem eru notaðir í virtum banka í Sviss, og það er alveg rétt að foreldrar Dorritar og aðrir í fjölskyldunni hafa notað þennan banka enda hafa þau stundað verslun og viðskipti í Sviss í áratugi, en Dorrit hefur aldrei átt neinn reikning eða stundað nein viðskipti við þennan banka og hvað snertir Jaywick, sem hefur verið nefnt í þessu sambandi, þá hefur hún aldrei komið að því félagi og vissi ekkert um það og á enga hagsmuni þar að gæta. Og annað sem þarna hefur komið fram eru fyrirkomulag erfðamála sem foreldrar hennar gerðu og taka ekki gildi fyrr en þau eru bæði látin,“ sagði Ólafur. 

Taldi spurninguna ekki snúast um foreldra Dorritar

Þarna hafði Ólafur svarað því að hann taldi spurningu fréttamanns CNN hafa snúið að fjölskyldu sinni á Íslandi en fréttamaður CNN spurði Ólaf einmitt að því hvort eiginkona hans ætti einhverjar aflandseignir.

Var hann því spurður í hádegisfréttum Bylgjunnar hvort hann liti ekki á Dorrit sem fjölskyldu sína?

„Jú, jú, ég geri það vissulega. En hvað snertir foreldra Dorritar þá voru þau um sjötugt þegar ég hitti þau og hef í sjálfu sér ekki haft mikil samskipti við þau þó ég beri miklar virðingu fyrir þeim og Shlomo (Moussaieff, faðir Dorritar) nýtur mikillar virðingar í heimi safnara á fornmunum og sama gildir um konu hans. En ég hef aldrei litið á þau sem fjölskyldu með sama hætti og Döllu og Tinnu og fjölskyldur þeirra og hér á Íslandi. Ég hitti þau kannski einu sinni til tvisvar, þrisvar á ári. Þau lifa sínu sjálfstæða lífi og voru þegar orðin öldruð þegar ég hitti þau. Þannig að þegar ég er spurður um fjölskyldu mína, hvort sem það er af þér eða Christiane Amanpour , þá skil ég þá spurningu sem ég og Dorrit og dætur mínar og fólk þeirra hér á Íslandi.“

En þarna varstu einmitt spurður um Dorrit og hún hefur tengsl við aflandsfélög?

„Einu tengslin sem þarna voru komin fram snerta það að foreldrar hennar hafa ákveðið að hún og systur hennar fái arf að þeim látnum.“

Segir málið hvorki hafa skaðað embættið né ímynd Íslands

Spurður hvort þetta mál hafi skaðað forsetaembættið svaraði hann því neitandi.

„Ég hef ekki séð neinn vitnisburð um það að það hafi skaðað forsetaembættið og eins og ég sagði við þig á áðan að ef þú tekur þessa grein í Guardian, sem var fjórðungur úr síðu eða svo, þá veit ég ekki til þess að það hafi verið nein umfjöllun um þetta mál í breskum fjölmiðlum að öðru leyti, þetta hefur verið mikil umræða um það hér. Hún hefur auðvitað verið að miklu leyti knúin áfram af ákveðnum tilfinningum eða í samhengi við það sem var að gerast hér í íslensku hagkerfi. En ég hef ekki séð neinn vitnisburð um það hafi skaðað forsetaembættið,“ svaraði Ólafur og taldi einnig að þessi umfjöllun hefði ekki skaðað ímynd Íslands. 

Hefur ekki áhrif á ákvörðun hans um framboð

Spurður hvort þetta hefði haft áhrif á ákvörðun hans um að bjóða sig fram svaraði hann því einnig neitandi. „Það hefur ekki haft nein áhrif á það vegna þess að þegar ég tek ákvarðanir þá tek ég ákvarðanir út frá þeim grundvelli hvernig hlutirnir eru í raun og veru en ekki eftir hasarnum. Og hvað mér finnst í mínu hjarta og í mínum huga.“

Nánar verður rætt við Ólaf Ragnar í kvöldfréttum Stöðvar 2.