Frábær opnun í Norðurá

Laxveiðitímabilið hófst í dag með opnun Norðurár og það er óhætt að segja að þessi opnun hafi farið langt fram úr væntingum.

Það er alltaf mikil spenna yfir fyrstu vakt í Norðurá og það var engin undantekning þar á í dag þegar fyrstu köstin voru tekin klukkan sjö í morgun og það tók ekki langan tíma að landa fyrsta laxinum en hann kom á Eyrinni og þar voru teknir í það minnsta fimm í viðbót.  "Þetta var frábær morgun hjá okkur en það komu þrettán laxar á land núna fyrir hádegi og ætli það hafi ekki sloppið af kannski sex eða sjö fyrir utan allar tökurnar og laxana sem hreinsuðu sig" sagði Einar Sigfússon þegar við heyrðum í honum rétt eftir hádegi í dag.

Það er greinilega mikið af laxi gengin í ánna því það var mikið líf fyrir neðan Laxfoss og heldur óvenjulegt að lenda í svona veislu strax á fyrsta degi.  Það veit vonandi á gott því göngurnar eru bara rétt að byrja og það sem alir veiðimenn vona er að það verði góður stígandi eins og í fyrra og vonandi gott veiðisumar í vændum.