Genesis lúxusmerki Hyundai ekki selt í Evrópu þennan áratuginn

Í fyrra tilkynnti Hyundai að fyrirtækið hefði stofnað sérstaka lúxusbíladeild innan fyrirtækisins sem fékk nafnið Genesis. Þetta lúxusbílamerki stofnaði Hyundai að mestu til að herja á Bandaríkjamarkað, líkt og Toyota gerði fyrstu með Lexus lúxusbílamerki sitt.

Genesis bílar verða þó seldir víðar en í Bandaríkjunum, eða í Kína, S-Kóreu og miðausturlöndum. Bið verður á því að Hyundai bjóði Genesis bíla á erfiðasta bílamarkaði heims, í Evrópu. Hyundai segir að það verði ekki á þessum áratug en líklega fljótlega á þeim næsta.

Ástæða þess er að Hyundai skortir samkeppnishæfar vélar í bílana og að engir jeppar og jepplingar eru að finna í bílaúrvali Genesis, heldur eingöngu stórir fólksbílar. Hyndai stefnir hinsvegar að því að bjóða 6 mismunandi bílgerðir Genesis við upphaf næsta áratugar og þá verði bílaúrval merkisins orðið fært um að keppa við hinn erfiða lúxusbílamarkað Evrópu sem telur meðal annars lúxusbílamerkin Mercedes Benz, BMW, Audi og Porsche. Meðal þessara sex bíla verða þá tvær gerðir jepplinga.