Flugumferðarstjórar funda í dag

Samningafundur í kjaradeilu flugumferðarstjóra og Isavia hefur verið boðaður klukkan 13 í dag í húsakynnum ríkissáttasemjara. Takist ekki samningar verður deilunni vísað til gerðardóms næstkomandi föstudag.

Lítið hefur miðað í viðræðunum sem staðið hafa yfir frá því í nóvember. Alþingi setti lög á yfirvinnubann flugumferðarstjóra hinn 8. júní síðastliðinn en samkvæmt þeim hafa samninganefndir frest fram á föstudag til að ná sáttum í deilunni, annars verður skipaður gerðardómur sem úrskurðar um laun flugumferðarstjóra.

Deiluaðilar hafa undanfarna daga reynt að ná sáttum, en neita þó að gefa upp hver gangur viðræðnanna er nú.