Góð veiði á bleikju í Þingvallavatni

Þingvallavatn var lengi í gang í sumar en síðustu daga hefur veiðin heldur betur tekið við sér.

Það er oft þannig að þegar það gerir bjarta og sólríka daga er morgunveiðin og kvöldveiðin oft feyknagóð í Þingvallavatni.  Þegar það er talað um morgun og kvöldveiði er besti tíminn til að mynda á morgnana frá 6:00 til 10:00 og svo tekur veiðin oft aftur við sér á kvöldin frá 19:00 og til miðnættis.  Það veiðist alveg bleikja líka yfir hábjartann daginn en ekkert í þeim mæli sem hún gerir kvölds og morgna.

Þjóðgarðurinn er að gefa mjög vel og allir þekktir veiðistaðir inni og vel það.  Um helgina var mikil umferð á t.d. Öfugsnáða og Pallinum en málið er að núna er góð bleikjugengd um allann þjóðgarð og það er um að gera að prófa sig áfram á sem flestum stöðum.  Þetta er besti tíminn í vatninu núna og hann varir í 2-3 vikur í viðbót en svo minnkar takan alltaf þegar nær dregur hrygningu.  Veiðimenn sem eru duglegir að stunda vatnið tala um að bleikjan sé mun vænni en í fyrra og að það sé mun meira af henni.