Besta opnun Stóru Laxár fyrr og síðar

Opnunarhollin hafa lokið veiðum í Stóru Laxá og þegar tölurnar eru gerðar upp er ljóst að um bestu opnun í ánni er að ræða.

Samtals var veiðin af öllum svæðum 73 laxar á tveimur og hálfum dögum og það hefur aldrei áður verið viðlíka veiði í Stóru Laxá fyrstu dagana, ekki einu sinni nálægt því.  Árni Baldursson sagði í samtali við Veiðivísi í morgun að mikil ferð hefði verið á laxinum síðustu vaktina og veiðistaðir á svæðum 1 og 2 þar sem mikið af laxi lá fyrstu vaktirnar hefðu verið tómir þegar leið á og urðu veiðimenn varir við að laxinn var að ganga af mikilli ferð upp á efri svæðin.

"Þetta var alveg meiriháttar opnun og gaman að sjá hvað það var mikið af fiski og við sáum laxa á eiginlega öllum stöðum" sagði Árni Baldursson í morgun.  "Það skemmtilegasta við þetta er samt hvað stærðin á löxunum var góð.  Við vorum með 102 sm lax stærstan og marga 85-95 sm.  Við erum eiginlega bara þreytt í höndunum eftir þessi átök" bætti Árni við en hann er nú á leiðinni í Hofsá og munum við örugglega fá fréttir frá honum að austan en Hofsá átti ágætis opnun í vikunni.