"Af hverju má ekki taka við kristnum hælisleitendum ef verið er að taka við þeim yfir höfuð?“

Helgi Helgason, formaður Íslensku þjóðfylkingarinnar, hefur í sumar starfað hjá lögreglunni á Suðurnesjum í landamæragæslu. Hans starf er á Keflavíkurflugvelli þar sem hann er líklegast fyrsti Íslendingurinn sem margir erlendir gestir landsins mæta þegar þeir rétta honum vegabréf sín til skoðunar.

Ein af grunnstefnum ÍÞ er að stórefla löggæslu, landhelgi- og tollgæslu á Íslandi og auka þátttöku í öryggis- og varnarmálum með beinum hætti. Einnig er það stefna ÍÞ að Íslendingar slíti sig frá Schengen-samkomulaginu og að landið verði því ekki lengur hluti af því svæði þar sem fellt er niður allt eftirlit á innri landamærum samningsríkjanna. Hugmyndin á bak við það er að auðvelda íbúa Schengen-svæðisins frjálsa för um svæðið.

„Ég er aðallega að taka á móti fólki á Schengen-svæðinu,“ segir Helgi Helgason formaður Íslensku þjóðarfylkingarinnar um sumarstarfið. „Það er þá aðallega fólk sem er að koma frá Bretlandi, Bandaríkjunum og Kanada. Þeir flóttamenn sem koma hingað eru þegar komnir inn á Schengen svo þeir eru að koma frá Danmörku, Svíþjóð og öðrum Evrópulöndum þar sem þú þarft ekki að sýna passa þegar þú ferð yfir landamærin.“

Kemur ekki nálægt málum hælisleitenda í vinnunni

Helgi segist ekkert koma nálægt málum hælisleitenda í vinnu sinni. Hans vinna er að bjóða fólk velkomið, taka á móti vegabréfum þeirra og skanna þau inn í kerfið. Komi upp eitthvað mál vegna þessa er kallað á lögregluna á staðnum sem þá sér um yfirheyrslu.

„Þetta er bara sumarstarf. Ég er bara einn þeirra sem lenti í hruninu. Ég hefði alveg eins getað endað í garðvinnu. Mér bara bauðst þetta starf. Það er ekki eins og ég hafi sóst eitthvað í þetta. Þetta er algjörlega tilfallandi. Ég sótti um nokkur sumarstörf og fékk þetta.“

Helgi hefur því ekki vald til þess að stöðva inngöngu ferðamanna vegna persónulegra skoðana sinna. Sama hverjar þær kynnu að vera. Það er þó ekkert leyndarmál að ÍÞ leggur áherslu á setja sig upp á móti hugmyndafræði íslam. Í grunnstefnunni er tekið fram að fylkingin styðji kristin gildi og trúfrelsi nema í þeim tilfellum sem trúarbrögðin séu andstæð stjórnarskrá landsins.

Það er mat Helga að íslam geri það og er einnig tekið fram í grunnstefnunni að ÍÞ sé á móti byggingu mosku á Íslandi, vilji banna búrkur og að þeir séu á móti því að múslimar hérlendis fái að halda uppi skóla.

„Það er fáránleg hugmynd að við viljum einhvern veginn torvelda straum útlendinga til Íslands. Við höfum ákveðnar skoðanir á því að herða hér lög um útlendinga og við höfum sérstakar áhyggjur af uppgangi íslam.“

Segist ekki ala á útlendingahatri

Helgi segir stefnu ÍÞ aðallega eiga við hvaða hælisleitendur fái inngöngu hér á landi.

„Sú hugmynd virðist vera sett upp af andstæðingum okkar að við viljum loka landinu og að við séum að ala á útlendingahatri og andúð. Ég skil ekki hvaðan sú hugmynd kemur.“

En þið viljið að það sé valið á milli fólks eftir trú, er það ekki? Þið viljið hamla inngöngu múslima til Íslands?

„Af hverju má ekki taka við kristnum hælisleitendum ef á annað borð er verið að taka inn hælisleitendur yfir höfuð?“

Baráttuatriði nú þegar í reglugerð ÚTL

Helgi segir ÍÞ ekki bara vera að berjast gegn íslamsvæðingu Íslands heldur einnig gegn því að fólk sæki hér um hæli frá löndum sem eru ekki stríðshrjáð eða að hælisleitendur sem stafar ekki ógn á eigin lífi fái hér hæli. Bæði þessi atriði eru nú þegar hluti af reglugerð Útlendingastofnunar um samþykktir varðandi hælisumsóknir.

Annað atriði sem ÍÞ berst fyrir er að Útlendingastofnun taki upp svipað kerfi og er í öðrum Norðurlöndum þar sem afgreiðsla hælisumsókna taki ekki lengri tíma en 48 klukkustundir.

40 prósent meðlima ÍÞ búa erlendis

Helgi segir að meðlimir Íslensku þjóðarfylkingarinnar séu nú um 130 talsins. Um 40 prósent þeirra eru Íslendingar sem eru innflytjendur í öðrum löndum. Þar af er stærsti hópurinn í öðrum Norðurlöndum sem eru sammála stefnu ÍÞ. Þegar Helgi er spurður hvernig fólk sé í fylkingunni spyr hann blaðamann;

„Ertu að spyrja hvort við séum allir hvítir og kristnir?“

Nei, ekkert endilega. Ég er bara að spyrja um hvernig fólk sé í fylkingunni?

„Þetta er alls konar fólk. Ég get til dæmis nefnt það að einn okkar harðasti stuðningsmaður er samkynhneigður og kristinn. Það er fólk sem er kristið í okkar hreyfingu líka og það starfar hlið við hlið með fólki sem er ekkert endilega kristið eða jafnvel samkynhneigt.“